“Borussiya Dortmund”dan qeyri-adi qərar: Telefonundan az istifadə edən azarkeş mükafatlandırılacaq
Almaniyanın “Borussiya Dortmund” klubu stadionda azarkeşlərin diqqətini mobil telefonlardan daha çox oyuna yönəltmək üçün yeni təşəbbüs elan edib. Klub matç zamanı telefonundan az istifadə edən tərəfdarlara mükafatlar təqdim etməyi planlaşdırır. Təşəbbüsün məqsədi tribunaların ənənəvi futbol atmosferini qorumaq və azarkeşlərin oyunu daha yaxından izləməsini təşviq etməkdir.
Yeni sistem klubun mobil tətbiqindəki xüsusi azarkeş rejimi vasitəsilə işləyəcək. Tətbiq qarşılaşma zamanı telefon ekranının neçə dəfə açıldığını hesablayacaq. Telefonundan daha az istifadə edən iştirakçılar daha çox xal toplayacaq. Fasilə zamanı telefondan istifadə isə bu hesablamaya daxil edilməyəcək.
Toplanan xallara görə azarkeşlər imzalı futbol formaları və klub məhsulları üçün hədiyyə kartları qazana biləcəklər. Layihənin şənbə günü “Ayntraxt Frankfurt”la ev oyunundan etibarən tətbiq edilməsi nəzərdə tutulur. İştirak tamamilə könüllüdür: stadionda mobil telefondan istifadə qadağan edilmir.
Bu addım Almaniya futbolunda tribunaların kommersiya məqsədli sosial media çəkilişlərinə çevrilməsi ilə bağlı müzakirələrin fonunda atılıb. “Herta Berlin” və “Dinamo Drezden” də kommersiya xarakterli videoçəkilişlərə məhdudiyyətlər tətbiq etmək istiqamətində qərarlar verib. Dortmundun yeni layihəsi isə qadağadan daha çox azarkeşləri həvəsləndirməyə əsaslanır.




Комментарии