Hoffenhaym Bayer Leverkuzeni darmadağın etdi: 11 dəqiqədə üç qol!
Almaniya Bundesliqasının VII turunda “Hoffenhaym” öz meydanında “Bayer Leverkuzen” üzərində 3:0 hesablı inamlı qələbə qazanıb. Sinsheym şəhərində keçirilən qarşılaşmanın ilk hissəsində qol vurulmasa da, son dəqiqələrdə meydan sahibləri rəqibin müdafiəsini üç dəfə yarmağı bacarıblar. Bu nəticə Leverkuzen təmsilçisinin uğurlu seriyasını dayandırıb.
Görüşün 79-cu dəqiqəsində Andrej Kramariç penaltini dəqiq yerinə yetirərək hesabı açıb. Penalti epizodu “Bayer”in kapitanı Edmond Tapsobanın Fisnik Asllaniyə qarşı qayda pozuntusundan sonra yaranıb. Baş hakim Daniel Zibert VAR görüntülərinə baxdıqdan sonra 11 metrlik cərimə zərbəsi təyin edib. Kramariçin qolu həm də “Hoffenhaym”ın Bundesliqa tarixində 1000-ci qolu olub.
Hesab açıldıqdan sonra “Bayer Leverkuzen” bərabərlik üçün hücumlarını artırıb. Lakin qonaqların irəli atılması müdafiədə boşluqlar yaradıb. 89-cu dəqiqədə Aleksander Prass əks-hücumdan sonra fərqi iki topa çatdırıb. Avstriyalı futbolçu qol sevincində formasını çıxardığı üçün ikinci sarı vərəqəni alaraq meydandan kənarlaşdırılıb.
Əlavə vaxtda “Hoffenhaym” üçüncü qolu da vurub. Kramariçin zərbəsi tirə dəydikdən sonra Maks Mörştedt qayıdan topu qapıya göndərib. Beləliklə, uzun müddət bərabər səviyyədə keçən görüş son dəqiqələrdə meydan sahiblərinin böyük hesablı qələbəsi ilə nəticələnib.
Bu məğlubiyyət “Bayer Leverkuzen”in bütün turnirlərdə ardıcıl altı qələbədən ibarət seriyasına son qoyub. Komanda baş məşqçi Karles Martinesin rəhbərliyi altında ilk dəfə qol vura bilməyib. “Hoffenhaym” isə uğursuz mövsüm başlanğıcından sonra vəziyyətini yaxşılaşdıraraq turnir cədvəlində onuncu pilləyə yüksəlib.




Комментарии